Тасалăх – тĕпре

Тавралăха тасалăха тытасси – сăваплă ĕç. Вăл кашни çын тивĕçĕ пулнине пурин те асра тытмалла. Çĕре çÿп-çап пăрахса ăна тепри пуçтарать тесе шанмалла мар. Тăван тавралăх илемĕ – харпăр хăй аллинче.  

Граждансене пурăнма лайăх условисем туса парас, тавралăха тирпей-илем кĕртес, çавăн пекех лартнă йывăç-курăксене çирĕплетес тĕллевпе Шупашкар районĕнче апрелĕн 5-мĕшĕнчен пуçласа майăн 31-мĕшĕсенче çурхи санитарипе экологи уйăхлăхĕ иртнĕ. Унпа килĕшÿллĕн çынсем пурăнакан вырăнтан 2085 тăваткал метр çÿп-çап турттарса кăларнă тата 102 санкцилемен каяш вырăнĕсене пĕтернĕ. Районти ял тăрăх территорийĕсенчи çăвасене, палăксене, обелисксене тасатнă. 3113 тăваткал метр лаптăк парксене, скверсене, газонсене тата клумбăсене тирпейленĕ. Çавăн пекех 21 пин ытла лăсăллă тата çулçăллă йывăçсем лартнă.

Санитарипе экологи уйăхлăхне 3 пин ытла çын хутшăннă: район, ял тăрăх администрацийĕсен, информаципе культура центрĕсен, организацисемпе предприятисен ĕçченĕсем тата шкул ачисемпе район çыннисем. Ешерекен тата таса вырăнта сывлама та çăмăлрах-çке.